Узняцца на "Купалаўскую вышыню"
27 красавіка ў сцянах адразу чатырох факультэтаў нашага ўніверсітэта прайшла самая маштабная краязнаўчая навукова-практычная канферэнцыя студэнтаў і вучняў у краіне пад назваю “Купалаўская вышыня”.
Для ўдзелу ў фінальным этапе канферэнцыі было даслана на папярэдні разгляд спецыялістаў розных напрамкаў навукі 529 вучнёўскіх і студэнцкіх краязнаўчых работ з усіх раёнаў Гродзенскай вобласці. У выніку было атабрана 222 работы, якія склалі змест 25 секцый. Менавіта такі спектр краязнаўчых напрамкаў ўвасобіла гэтая канферэнцыя. Трэба падкрэсліць, што сваёй канцэпцыяй і метадычнымі падыходамі канферэнцыя “Купалаўская вышыня” працягвае педагагічную традыцыю, створаную дзесяцігоддзем правядзення канферэнцыі “Край Гарадзенскі” (якая праводзілася Гродзенскім абласным цэнтрам турызму і краязнаўства ў шчыльным супрацоўніцтве з ГрДУ імя Янкі Купалы на базе 4-й і 1-й гродзенскіх гімназій).
Работу журы секцый канферэнцыі “Купалаўская вышыня” ажыццявілі дзесяткі выкладчыкаў факультэтаў гісторыі, камунікацыі і турызму, біялогіі і экалогіі, філалагічнага, мастацтваў і дызайну. Гэтую працу педагогі вышэйшай школы рабілі разам з вядомымі настаўнікамі-краязнаўцамі са школ г. Гродна і Гродзенскай вобласці. А арганізацыйную дапамогу ажыцяўлялі супрацоўнікі Гродзенскага абласнога цэнтра турызму і краязнаўства і выкладчыцыкі кафедры турызму і культурнай спадчыны.
На пленарным пасяджэнні канферэнцыі прагучалі прывітальныя словы кіраўніка абласнога цэнтра турызму і краязнаўства А.А. Калаур, прарэктара па навуковай працы ГрДу імя Янкі Купалы Н.З. Башун. Сапраўдным падарункам для ўсіх удзельнікаў канферэнцыі сталі словы ганаровага госця канферэнцыі - вядомага гродзенскага краязнаўцы і, адначасова знакамітага беларускага навукоўца – член-карэпандэнта НАН Беларусі, прафесара, доктара біялагічных навук А.Г. Майсяёнка. Прыемнай ”дробяззю” для юных даследчыкаў стаў і дыплом, дызайн якога быў спецыяльна распрацаваны старшым выкладчыкам кафедры дызайна А.А. Пракаповіч.
Работа секцый канферэнцыі стала дэманстрацыяй вынікаў краязнаўчых пошукаў настаўнікаў і вучняў, пытанняў і адказаў на іх аўтараў даследчых работ, зразумелых хваляванняў і сапраўднай атмасферы радасці ад пошуку ісціны – галоўнага ва ўсялякай навуковай справе.
Удзельнікі канферэнцыі атрымалі дыпломы І, 2 і 3 ступеняў, а таксама слушныя парады прафесійных навукоўцаў. Можна шчыра парадавацца за такія першыя крокі юных даследчыкаў на купалаўскую вышыню. Хочацца спадзявацца, што ў гэтай канферэнцыі ёсць будучыня.
