ДАКРАНУЛІСЯ ДА ТАЯМНІЦ БРЫГІЦКАГА КАСЦЁЛА
4 кастрычніка студэнты 1 і 2 курсаў спецыяльнасці “Турызм і гасціннасць” разам з выкладчыкамі Ю.У. Кейко і В.Р. Карнелюком мелі магчымасць пазнаёміцца з адным са старажытных гродзенскіх кляштароў і касцёлаў – Брыгіцкім. Экскурсію правёў пробашч касцёла а. Антоній (Грэмза).
Студэнты пазнаёміліся з гісторыяй касцёла Дабравешчання Прысвятой Мацеры Божай, убачылі галоўныя сакральныя каштоўнасці храма, наведалі ў былой крыпце касцёла музей, створаны намаганнямі а. Антонія, зазірнулі на ўсе паверхі старадаўняга лямуса.
Асобнаю часткаю экскурсіі было знаёмства з найноўшай выставаю, прысвечанай памяці 11-ці навагрудскіх мучаніц – сясцёр-назарецянак, растраляных фашыстамі 1 жніўня 1943 г. у якасці закладнікаў. Сёлета споўнілася 80 год з той трагедыі. Далучаныя да ліку блажэнных, гэтыя манахіні з’яўляюцца прыкладам ахвярнасці, а іх гібель сведчаннем страшэнных часоў фашысцкай акупацыі на нашых землях. Створаныя сучаснымі беларускімі мастакамі партрэты сясцер-назарецянак складаюць выставу, якая дэманструецца ў сцянах актавай залы брыгіцкага кляштара. Айцец Антоній распавёў студэнтам пра жыццё і подзвіг гэтых жанчын, а таксама пра памяць, якая захоўваецца як на Навагрудчыне, так і ва ўсёй каталіцкай царкве Беларусі.
Атрыманыя студэнтамі новыя веды і новыя вобразы Гродна – яшчэ адна, на гэты раз краязнаўчая, цяглінака ў фармаванні ў маладых людзей патрэбных для далейшай турыстычнай прафесійнай дзейнасці кампетэнцый.
