Круглы стол "Песняры беларускай душы"
23 верасня ў галоўным корпусе ГрДУ імя Янкі Купалы адбыўся круглы стол "Песняры беларускай душы", прысвечаны 140-годдзю Янкі Купалы і Якуба Коласа, 110-годдзю Максіма Танка. Арганізатарам мерапрыемства выступіў Цэнтр даследаванняў дыяспар і замежнага беларусазнаўства, які дзейнічае пры факультэце гісторыі, камунікацыі і турызму.
У круглым стале прынялі ўдзел прадстаўнікі Дзяржаўнага літаратурнага музея Янкі Купалы - дырэктар музея Г. Галінская і вядучы навуковы супрацоўнік П. Каралёў.
Быў падпісаны дагавор аб супрацоўніцтве ГрДУ імя Янкі Купалы і Дзяржаўнага літаратурнага музея Янкі Купалы, дзе акрэслены шэраг сумесных мерапрыемстваў па ўшанаванню памяці народнага паэта. Пад час круглага стала выступіла старшая выкладчыца кафедры турызму і культурнай спадчыны С. Чувак, якая распавяла прысутным аб цікавых старонках біяграфіі Якуба Коласа. Мадэратарам мерапрыемства выступіў дацэнт кафедры гісторыі Беларусі, археалогіі і спецыяльных гістарычных дысцыплін, кіраўнік Цэнтра даследаванняў дыяспар і замежнага беларусазнаўства А. Горны, які таксама распавеў аб невядомых фактах з жыцця Максіма Танка. Круглы стол выклікаў жывую зацікаўленнасць студэнтаў з розных факультэтаў - філалагічнага, педагагічнага, факультэта мастацтваў і дызайна, факультэта гісторыі, камунікацыі і турызму.
